شو تعلمت بعد ما فشلت بأول مشروع عملته

بدي أكون صريح معك من البداية، أنا مش خبير أعمال ولا جاي أعطيك مواعظ. أنا مبرمج قعدت سنين وأنا ببدأ مشاريع وما بتوصل لأي مكان. وبكتب هالحكي هسا لأنه عن جد كان نفسي حدا يقعد معي زمان ويحكيلي هالكلام قبل ما أضيع وقت وجهد.

أكبر غلطة كنت أكررها دائماً

فكرتي زمان كانت بسيطة: أقدم خدمات للمحلات والمشاريع الصغيرة اللي ما معها ميزانية تدفع لشركات تسويق كبيرة عشان تطلع أونلاين. أعمللهم مواقع، أساعدهم بحضورهم الرقمي، وهيك شغلات.

الفكرة بحد ذاتها ما كانت سيئة، بس اللي كان جد غلط هو الطريقة اللي اشتغلت فيها.

ما كان عندي أي خبرة لا بالتسويق ولا بالمبيعات، وما كان معي مصاري أستثمرها، وأكيد ما كان عندي فريق يمسك كل التفاصيل زي الشركات الكبيرة. بس نزلت على السوق لحالي، مسكت مشاريع كبيرة أكبر من طاقتي، حرقت حالي بالشغل، وبالآخر… وقفت.

حاولت أدور على شريك معي عأساس الأمور تنحل، بس برضه ما زبطت وفقدت الشغف وحطيت الفكرة كلها على جنب.

والقصة ضلت تتكرر: أتحمس لفكرة جديدة، أقعد أشهر أبرمج وأبني فيها، وبالأخير أكتشف إنه فش حدا بشتري مني! كنت أفتح مشاريع بس لأني “حابب أفتح مشروع”، مش لأنه في طلب حقيقي بالسوق على الإشي اللي بعمله.

وهي كانت المشكلة الأساسية. وأخذت مني سنين عشان أستوعبها عن جد.

شو اللي غيّر تفكيري بالكامل؟

لحد ما قعدت مع صاحب إلي بأيام الكلية كان شاطر جداً بالمبيعات والتسويق. الزلمة ما علمني سر خرافي ولا معادلة سحرية، علمني إشي أساسي وبديهي بس إحنا دائماً بننساه:

صراحة حسب ما جربت، ما تبدأ أي مشروع قبل ما تعرف السوق شو بحتاج. شوف إيش في إقبال بالسوق وإيش الناس عن جد بتحتاج عشان تقدر تبيع بسهولة.

شوف الناس على شو بتدفع مصاري هسا، وشو المشاكل اللي بتواجههم وبدها حل، وبعدين فكّر كيف بتقدر تخدم هذا الطلب. مش العكس!

الكلام ببين سهل وبديهي لما تقرأه، بس صدقني، أغلب الناس (وأنا أولهم زمان) بنعمل العكس تماماً: بنقعد نبني شهور بعدين بنقعد ندور “مين ممكن يشتري منا؟”.

ركّز بإشي واحد، ما تبيع كل إشي

الدرس الثاني اللي أكلت كف مرتب عشانه: اختار منتج أو خدمة وحدة بس، وحدد شريحة وحدة من السوق. لا تحاول تبيع كل إشي لكل الناس.

يعني لو حابب مجال التجارة مثلاً:

ما تفتح متجر فيه “كل إشي”، اختار تخصص: عطور رجالي أو نسائي.
أدوات مطبخ وأكسسوارات.
ألعاب أطفال.
منتج واحد مخصص ومركّز (مثلاً سجادات صلاة مع مصاحف هدايا، أو محافظ جلد طبيعي).
مكملات غذائية وبروتين للجيم.

ولو حابب مجال الخدمات:

مواقع ووردبريس لأصحاب المشاريع الصغيرة.
استشارات (بس بشرط تكون جد فاهم المجال وعندك خبرة حقيقية فيه).
تبني براند شخصي: تعلم الناس إشي إنت شاطر فيه ببلاش أول، وبعدين تقدم جلسات خاصة أو متابعة بمصاري.

كل ما كان تركيزك أضيق ومحدد، كل ما صار التسويق أسهل، البيع أسهل، وتنفيذ الخدمة أو تسليم المنتج أسهل بمراحل.

قبل ما تختار فكرتك، اسأل حالك هالأسئلة وجاوب بصدق

لا تختار فكرة بس لأنها “حلوة” بعينك. اقعد مع حالك وجاوب بصراحة:

هل بقدر أقدم هالخدمة أو أوفر هالمنتج بجودة؟ وإذا ما بفهم بالمجال، هل عندي استعداد حقيقي أتعلمه صح؟
هل عندي معارف وعلاقات بقدر أستغلها؟ يعني، بتعرف حدا عنده محل جملة تاخذ منه بسعر ممتاز؟ عندك شبكة معارف ممكن يكونوا أول زباين إلك؟
هل بقدر أسوق هالمشروع؟ وهل بحتاج ميزانية إعلانات ضخمة عشان أبدأ، ولا بقدر أتحرك وأجيب أول مبيعات بجهدي الشخصي؟
كيف موضوع التوصيل والشحن؟ هل المنتج بحتاج تكلفة شحن عالية؟ هل الخدمة فيها دعم ومتابعة بتاكل وقتك؟ وهل حسبت هالتكاليف من ضمن سعرك؟

إذا مش عارف تجاوب على هدول بصراحة، معناها لسه مش جاهز. وعادي جداً، أحسن ما تكتشف هالاشي بعد ما تكون صرفت كل اللي معك.

الفكرة مش هي اللي بتنجحك

بدي تركز بهاي الكلمتين منيح: الفكرة لحالها ما بتسوى إشي وما بتضمن أي نجاح.

اللي بفرق عن جد هو:

التنفيذ: هل إنت شغال ومستمر بشكل يومي؟
حاجة السوق: هل الناس مستعدة تدفع مصاري هسا على هالحل؟
طريقة الشغل (Business Model): المصاري كيف بتدخل وكيف بتطلع؟

شفت أفكار عادية جداً بس تنفذت بذكاء واستمرار عملت مصاري محترمة. وشفت أفكار “خرافية ومبتكرة” ماتت بأرضها، لأن صاحبها ضل ملتهي بشكل اللوجو واسم البراند بدل ما ينزل يبيع أول بيعة!

وعلى سيرة هالقصة: ما تضيع وقتك بالاسم واللوجو. سمي اسم معقول ومقبول وامشي. لما المشروع يدخل مصاري بتغير الهوية واللوجو براحتك.

كيف توزع وقتك صح؟

هاي النقطة تعلمتها بعد وجع راس طويل. لما تكون مبرمج أو شخص بحب يبني، غريزتك بتخليك تقضي كل وقتك على المنتج: تصمم، تبرمج، تعدل، وتخلي كل إشي كامل مكمل.

غلط.

التوزيعة الصح اللي بتجيب نتيجة: 60% من وقتك تسويق ومبيعات، و40% بس على بناء المنتج. بعرف إنه الحكي غريب وصعب تتقبله كشخص تقني، بس صدقني، أحسن منتج بالعالم ما إله أي قيمة إذا ما حدا سمع فيه.

إذا ما عندك مهارات تسويق، اتعلمها. هذا جزء من الـ 60%: احضر فيديوهات، راقب المنافسين شو بعملوا، اتعلم كيف تكتب كلام ببيع ويقنع الناس. هذا مش خيار، إذا بتبني بدون ما تعرف تبيع مصيرك توقف.

وإشي أساسي كمان: جرّب فكرتك مع ناس حقيقيين. مش عيلتك ولا أعز صاحب الك، هدول بحبوك ورح يحكولك الفكرة بتجنن عشان ما يكسروا بخاطرك. احكي مع ناس غرباء، أصحاب محلات، ناس عن جد بتعاني من المشكلة اللي إنت بدك تحلها. اعمل صفحة بسيطة وشوف إذا في حدا جد مستعد يطلب قبل ما تحط شهور من عمرك.

خطة الخطوات العملية (Checklist)

هاي خطوات واضحة جمعتها من اللي مريت فيه، كان نفسي حدا يعطيني إياها أول ما بديت. امشي فيها بالترتيب:

كلمة أخيرة

أنا غلطت كثير لأني كنت أفتح مشاريع بس عشان “أفتح مشروع”، بدون دراسة، وبدون ما أفهم أنا لمين ببيع. بس حماس على الفاضي.

إذا طلعت بفائدة وحدة من كل هالمقال، خليها هاي: افهم السوق والناس شو محتاجة قبل ما تبني أي إشي. انزل، اسأل، افهم، وبعدين ابدأ اشتغل.

وإشي أخير نادر ما حدا يحكيه: مش كل الناس رح تفرحلك بنجاحك، حتى لو بينولك العكس. جهز حالك إنه يكون في غيرة وكلام فاضي وناس تختفي أول ما تبدأ تنجح. هذا جزء من اللعبة، خلي دائرتك صغيرة وتركيزك عالي.

توكل على الله، وابدأ صح.